اذكر ان اول مرة اتحرش فيا رجل كان عمري 12 سنة. كنت في الباص و حسيت بيد تلمسني من ورا عند مؤخرتي، اتفاجأت و مافهمت بعدين خفت و فكرت ليش لمسني بهذه الطريقة؟ لفت ورا و شفته في عينه ، تفاجئ هو وانا اتخايلته وحش مع انه كان رجل عادي جدا ممكن عنده عيلة و زوجة و بنات و خوات و كذا يعني .. بس في نظري كان وحش "بعبع" باللغة الدارجة.
و بعد هذه الحادثة بدأ مشواري الطويل مع التحرش الجنسي و الشفوي المتواصل في الشارع و في جامعة صنعاء و خلال عملي الصحفي اللي فرض عليا اني دايما اطلع من المكتب و اروح من مكان الى مكان. و كل يوم كان تحدي في وجه التحرش .. لدرجة اني لما حتى كنت اسافر برا اليمن كنت كل ما اطلع الطيارة او القطار او المواصلات العامة او سيارة شخصية حتى كان عندي هاجس مزمن انه اكيد الان احد بيتحرش فيا من ورا ، اكيد في حد بيلمسني بطريقة قذرة ، اكيد الان ... و عليها! بس عكس الوضع في اليمن، ما احد لمسني في الطيارة ولا في الامكان الثانية.
رحت مصر قبل ٤ شهور و شفت كيف الوضع سيئ جدا .. التحرش منتشر بشكل كبير ، صراحة احترت فين اكثر انتشار! في مصر و اليمن :٪ .. عموما الاهم هو انه التحرش لازم القانون يجرمه. لسة الان خلصت اشوف الفيلم ٦٧٨ عن التحرش و ذكرت كل الذكريات الاليمة .. انا كبنت يمنية مش مستحية اني اقول اني عانيت من التحرش و لازلت اعاني .. صحيح اني مش في اليمن حاليا بس التحرش مأثر فيا بشكل كبير و مأثر في نظرتي لرجال بشكل عام. اسف انه في عندنا رجال لايخافوا الله ولا قانون ـ هذا اذا اصلا كان في قانون!
